Neyðarþjónustan flytur í Kópavoginn

Neyðarþjónustan ehf. var stofnuð árið 1988 og verður því 30 ára á árinu.  Félagið var stofnað til að sinna almennri  lásasmíði, lásaviðgerðum og hvers konar neyðaropnunum, hvort sem um er að ræða húsnæði, bíla eða hirslur.

Fyrirtækið flytur nú að Skemmuveg 4 og mun reka þar verkstæði og verslun með lásatengdar vörur s.s. lykla, skrár, læsingar og hurðapumpur auk fleiri vara tengdum öryggisbúnaði og aðgangsstýringum. Forritun og smíði bíllykla er stór þáttur í starfseminni en einnig uppsetning, ráðgjöf og viðgerðavinna auk þess sem fyrirtækið sér um að loka vettvangi eftir innbrot og veðurtjón, m.a. með rúðuskiptum og viðgerðum á hurðum.

Hjá Neyðarþjónustunni starfa aðeins lásasmiðir með hreint sakavottorð sem fá bestu þjálfun sem í boði er hverju sinni. Lásasmiðir Neyðarþjónustunnar eru metnaðarfullir og leggja sig fram um að afla sér þekkingar á sínu sviði og fylgjast með nýjungum, enda örar tækniframfarir á þessu sviði.

„Barn í bíl“ – Neyðarþjónustan veitir ókeypis lásaopnun þegar börn eru læst inni í bíl og vill fyrirtækið þannig sýna samfélagslega ábyrgð og senda jákvæð skilaboð til samfélagsins.

Fyrirtækið hefur vaxið jafnt og þétt og eru starfsmenn nú orðnir 14.

Markaðsstofa Kópavogs býður Neyðarþjónustuna velkomna í Kóapvoginn.

Tryggingastofnun Ríkisins flytur í Kópavog

Tryggingastofnun Ríkisins er nú að flytja starfsemi sína frá miðbæ Reykjavíkur á miðsvæði höfuðborgarinnar í Smárahverfinu, en stofnunin verður til húsa að Hlíðarsmála 11. Hús­næðið tel­ur tæpa 2.600 fer­metra á fjór­um hæðum en meg­in­starf­semi Trygg­inga­stofn­un­ar verður á þrem­ur hæðum. Starfs­menn stofn­un­ar­inn­ar eru nú um 110 tals­ins.

Ekki er langt síðana að Sýslumaðurinn á höfuðborgarsvæðinu flutti starfsstöð sína í Hlíðarsmára 1 og þá hefur Útlendingastofnun komið sér fyrir á Dalvegi 18 og Menntamálstofnun í Víkurhvarfi 3. Landsréttur var endurreistur í vesturbæ Kópavogs, að Vesturvör 2, þar sem Siglingastofnun og síðar Samgöngustofa voru til húsa og þá má einnig geta þess að Íslandsbanki flutti höfuðstöðvar sínar í nýja turninn við Smáralind á síðasta ári.

Það er af sem áður var þegar póstnúmerið 200 þótti ekki nógu gott fyrir ríkisstofnanir og t.d. er ekki langt síðan að Kópavogsbær sá ástæðu til að senda formlega kvörtun til Fjármálaráðueytisins og Fjármálaeftirlitsins vegna kvaða sem fram komu í auglýsingu fyrir nýtt húsnæði fyrir starfsemi FME, en þar voru póstnúmerin 101 til 108 tilgreind sem möguleg staðsetning.

Það er jákvæð þróun að stjórnendur ríkisstofnanna allra landsmanna skuli hafa áttað sig á því að stofnanir geti dafnað og skilað góðri þjónustu fyrir utan póstnúmerið 101. Kópavogsbúar taka fagnandi á móti nýjum fyrirtækjum og stofnunum og bjóða starfsfólk þeirra velkomið í Kópavoginn.