Íþróttabíll Kóapvogs

 

Að frumkvæði Markaðsstofu Kópavogs hafa íþróttafélögin Breiðablik, Gerpla og HK sameinast um akstur á yngstu félögum sínum frá frístundaheimilum skólanna á íþróttaæfingar félaganna. Akstur hófst mánudaginn 3. september og verður þjónustan veitt, foreldrum að kostnaðarlausu, alla daga sem frístundarheimili eru opin í vetur. Tveir bílar verða á ferðinni frá kl. 13:30 til kl. 16:30 með viðkomu á öllum frístudarheimilum bæjarins og íþróttasvæðum félaganna. Þjónustan er opin öllu börnum á leið í tómstundastarf á vegum félaga í Kópavogi óháð því hvort þau séu skráð á frístundarheimili.
Þessu metnaðarfulla verkefni er ætlað að auka samþættingu skóla og íþróttastarfs, stytta vinnudag yngstu grunnskólabarna, nýta íþróttamannvirkin enn betur og jafna aðgengi allra barna að heilbrigðu íþrótta- og æskulýðsstarfi. Þjónusta við foreldra mun aukast verulega auk þess sem umhverfismengun og sóun mun minnka með minna skutli á æfingar.
Síðustu ár hafa félögin hvert í sínu lagi og hvert með sínu sniði verið að veita þessum hópi akstursþjónustu. Félögin hafa nú, að frumkvæðo og með leiðbeinandi aðstoð frá Markaðsstofu Kópavogs, sameinast um aksturinn með það að markmiði að veita enn betri þjónustu. Kópavogsbær mun styðja verkefnið en Teitur Jónasson sem einnig sér um skólaakstur fyrir Kópavogsbæ mun sjá um aksturinn.

Aðalfundur Markaðsstofu Kópavogs 2018

Aðalfundur Markaðsstofu Kópavogs 2018 var haldinn í Molanum mánudaginn 10. september sl.

Stjórnarformaður Markaðsstofunnar Anna María Bjarnadóttir setti fundinn og lagði til að Jón Halldórsson sæi um fundarstjórn og Björn Jónsson ritaði fundargerð og var það samþykkt samhljóða. Hún flutti síðan skýrslu stjórnar þar sem farið var yfir þau margbreytilegu verkefni sem Markaðsstofan hefur sinnt frá síðasta aðalfundi. Skýrslu stjórnar má finna í heild sinni í viðhengi hér fyrir neðan. Björn Jónsson fór yfir reikninga félagsins og í framhaldi opnaði fundarstjóri fyrir umræður um skýrslu stjórnar og reikninga félagsins. Góðar og málefnalegar umræður urðu um viðfangsefni Markaðsstofunnar og framtíðar áherslur í starfsemi hennar og voru mismunandi sjónarmið viðruð. Tillaga stjórnar um hækkun á aðildarfélagsgjaldi úr 12.500 kr í 15.000 kr. var samþykkt með þorra atkvæða. Þá voru tillögur stjórnar um minni háttar breytingar á samþykktum félagsins samþykktar samhljóða. Fundargerð aðalfundarins má finna í viðhengi hér fyrir neðan.

Kynnt var tilnefning Kópavogsbæjar á fjórum nýjum aðalmönnum í stjórn sem eru Helga Halldórsdóttir, Sigurður Sigurbjörnsson, Tómas Þór Tómasson og Elvar Bjarki Helgason. Úr stjórn fara Annna María Bjarnadóttir, Jón Halldórsson, Jónas Már Torfason og Jón Finnbogason ásamt varamönnum Þóru Ólafsdóttur og Auði Sigrúnardóttur. Anna María kvaddi sér hljóðs og bauð nýja stjórnarmenn velkomna að borðinu og þakkaði þeim sem hverfa á braut fyrir vel unnin störf og færði þeim blómvönd sem þakklætisvott fyrir þeirra framlag. Hún þakkaði Páli Ólafssyni skoðunarmanni reikninga sérstaklega fyrir góða aðstoð á árinu og færði honum blómvönd.  Anna var einnig leyst út með blómvendi í lok fundar og henni þakkað fyrir dugmikið starf.

Ný stjórn hélt sinn fyrsta fund miðvikudaginn 12. september og skipti þá með sér verkum þannig að Helga Halldórsdóttir var kjörinn formaður, Sigurður Sigurbjörnsson varaformaður og Tómas Hafliðason ritari stjórnar.

Aðalfundur Markaðsstofu Kópavogs, fundargerð.

Aðalfundur Markaðsstofu Kópavogs, skýrsla stjórnar.

Ársreikningur Markaðsstofu Kópavogs 2017.